اسلام آباد۔15ستمبر (اے پی پی) جاڑے شہراں وچال لوکاں کوں جدید اتے تیز رفتار سفر دی سہولت ݙیوݨ کیتے اسلام آباد اتے راولپنڈی وچال ریل سروس شروع کرݨ دا فیصلہ کیتا ڳئے جئیں دا آغاز مارگلہ ریلوے سٹیشن اسلام آباد توں راولپنڈی صدر سٹیشن تئیں تھیسی۔ ایں منصوبے دے تحت شہری صرف 20 منٹ اچ ݙوہیں شہراں وچال سفر پورا کر سگسن، جئیں نال ویلھا اتے ایندھن دی نمایاں بچت تھیسی اتے شاہراہاں تے ٹریفک دے دباؤ اچ وی گھٹکی آسی۔ وفاقی وزیر داخلہ محسن نقوی اتے وزیر ریلویز حنیف عباسی دی صدارت اہم اجلاس اچ منصوبے تے تکھا کم کرݨ دا فیصلہ کیتا ڳئے۔ اجلاس اچ وزیر مملکت برائے داخلہ طلال چوہدری دے نال نال اعلیٰ حکام شرکت کیتی۔ اجلاس اچ ایں ڳالھ تے اتفاق کیتا ڳئے جو ریل سروس دا آغاز مارگلہ ریلوے سٹیشن اسلام آباد توں راولپنڈی صدر سٹیشن تئیں کیتا ویسی۔ منصوبے دے فریم ورک ایگریمنٹ کوں آندے ہفتے حتمی شکل ݙتے تے ایں تے دستخط کیتے ویسن۔ فیصلے دے مطابق منصوبے کیتے ٹریک پاکستان ریلوے ݙیسی جڈانجو ریل سروس دا انتظام کپیٹل ڈویلپمنٹ اتھارٹی (سی ڈی اے) کول ہوسی۔ اجلاس اچ ریل سروس کیتے جدید ٹرین منگواوݨ تے وی اتفاق کیتا ڳئے۔ وزیر ریلویز حنیف عباسی آکھیا جو اے منصوبہ جاڑے شہراں دے لوکاں کیتے انقلابی سہولت ہوسی، جئیں دے ذریعے شہری تیز، محفوظ اتے گھٹ ویلھے اچ سفر کر سگسن۔ وزیر داخلہ محسن نقوی آکھیا جو اے منصوبہ وزیر اعظم محمد شہباز شریف دے عوامی ریلیف دے ویژن کوں نشابر کریندے، جئیں دی تکمیل نال ہزاراں شہریاں کوں معیاری اتے سستی سفری سہولت ملسی۔ وزیر مملکت طلال چوہدری آکھیا جو ٹرین سروس شہریاں کیتے گھٹ خرچ اتے تیز رفتار سفری سہولت ہوسی اتے ایں نال سڑکاں تے ٹریفک دا دباؤ وی گھٹ تھیسی۔ اجلاس اچ وفاقی سیکرٹری داخلہ، سیکرٹری ریلویز، چیئرمین سی ڈی اے، کمشنر راولپنڈی، کمانڈنٹ و ڈپٹی کمانڈنٹ ایف سی، آئی جی اسلام آباد پولیس، ڈپٹی کمشنر اسلام آباد اتے بئے اعلیٰ حکام وی شرکت کیتی۔
