پشاور۔16اگست (اے پی پی) خیبر پختونخوا اچ گزریل 48 گھنٹے اچ مینھ اتے فلش فلڈ اچ 307 لوک جاں بحق جݙاں جو 23 زخمی تھئن۔ پروونشل ڈیزاسٹر منیجمنٹ اتھارٹی (پی ڈی ایم اے) خیبر پختونخوا ولوں گزریل 48 گھنٹے اچ وسݨ آلے مینھ تے فلش فلڈ دے پاروں صوبے دے مختلف ضلعیں اچ جانی و مالی ضیان دی ابتدائی رپورٹ جاری کر ݙتی ڳئی اے۔ رپورٹ موجب گزریل 48 گھنٹے دے دوران تھیوݨ آلے مینھ اتے فلش فلڈ دے پاروں مختلف حادثیں اچ ہݨ تئیں 307 لوک جاں بحق اتے 23 زخمی تھئن، جاں بحق لوکاں اچ 279 مرد، 15 تریمتاں اتے 13 ٻال شامل ہن جݙاں جو زخمیاں اچ 17 مرد، 4 تریمتاں اتے 2 ٻال شامل ہن۔ مینھ اتے فلش فلڈ دے پاروں ہݨ تئیں دی رپورٹ موجب مجموعی طور تے 74 گھراں کوں ضیان پُڄے جیں اچ 63 گھراں کوں جزوی ضیان پُڄے اتے 11 گھر مکمل ڈھہ ڳئن۔ پی ڈی ایم اے موجب زور دے مینھ دا موجودہ سلسلہ 21 اگست تئیں وقفے وقفے نال جاری رہݨ دا امکان اے۔
.jpg)
